දරුවන්ට වඩාත් හොඳ රටක් නිර්මාණය කර දෙනවා

• උසස් පෙළ සිසුන්ට සහ 1 ශ්‍රේණියේ සිට 11 ශ්‍රේණිය දක්වා ඉගෙනුම ලබන සිසුන් ලක්ෂයකට ශිෂ්‍යත්ව ප්‍රදානය කිරිමේ වැඩසටහන ඇරඹේ.
• සංකේතාත්මකව සිසුන් 5108කට අද දින ශිෂ්‍යත්ව.
• එම අවස්ථාවේම හිඟ වාරික ද සමඟ ශිෂ්‍යත්ව මුදල් සිසුන්ගේ බැංකු ගිණුම්වලට බැර කෙරේ.
• ජනාධිපති අරමුදලින් අධ්‍යාපන ශිෂ්‍යත්ව පිරිනැමීමට මෙම වසරේ දී රුපියල් බිලියන 04ක්.

දැයේ දරුවන් වෙනුවෙන් ඉදිරි වසර 05-10 තුළ වඩා හොඳ රටක් නිර්මාණය කර දෙන බව ජනාධිපති රනිල් වික්‍රමසිංහ මහතා පැවසීය.

ජනාධිපතිවරයා ලෙස මේ රටේ කිසිඳු දරුවෙකුට දුක් විඳිමට ඉඩ නොතබන බව තමා තීරණය කළ බවත්, වසර දෙකක් වැනි කෙටි කාලයක් තුළ ආර්ථික අර්බුදයෙන් රට ගොඩගැනීමට තමා කැපවුයේ ඒ වෙනුවෙන් බවත් ජනාධිපතිවරයා අවධාරණය කළේය.

ජනාධිපති රනිල් වික්‍රමසිංහ මහතා මේ බව සඳහන් කර සිටියේ ජනාධිපති ශිෂ්‍යත්ව ප්‍රදානය වෙනුවෙන් අරලියගහ මන්දිරයේ අද (19) පැවති උත්සවය අමතමිනි.

ජනතාවට ආදායමක් ලබාදීමට අස්වැසුම වැඩසටහන ක්‍රියාත්මක කළ බවත්, භූමියේ අයිතිය ලබාදීමට උරුමය වැඩසටහන ක්‍රියාත්මක කළ බවත් පැවසු ජනාධිපතිවරයා දරුවන්ට අධ්‍යාපනය ලබාදීම වෙනුවෙන් ජනාධිපති අධ්‍යාපන ශිෂ්‍යත්ව වැඩසටහන ආරම්භ කළ බවද සඳහන් කළේය.‍

එක් අධ්‍යාපන කලාපයකින් 2022 (2023) වර්ෂයේදී අ.පො.ස (උ.පෙළ) හදාරන සිසු දරු දැරියන් 60 බැගින් තෝරාගෙන, කලාප 100ක් ආවරණය වන පරිදි එක් දරුවෙකුට මාසිකව රුපියල් 6,000 බැගින් සිසුන් 6000ක් සඳහා වසර 02ක කාලයකට අධ්‍යාපන ශිෂ්‍යත්ව ලබාදීම මේ යටතේ සිදු කෙරේ. 2024 මාර්තු මස සිට එම දරුවන්ගේ අ.පො.ස (උ.පෙළ) අවසන් වන තෙක් අදාළ ශිෂ්‍යත්ව ලබාදීම සිදු වේ.

ජනාධිපති රනිල් වික්‍රමසිංහ මහතාගේ සංකල්පයකට අනුව ජනාධිපති අරමුදල විසින් දිවයිනේ සමස්ත පාසල් 10,126 ආවරණය වන පරිදි 1 ශ්‍රේණියේ සිට 11 ශ්‍රේණිය දක්වා ඉගෙනුම ලබන සිසුන් සඳහා ද ශිෂ්‍යත්ව වැඩසටහනක් ක්‍රියාත්මක කෙරේ.

එහිදී පාසලක ඉගෙනුම ලබන සිසුන් සංඛ්‍යාව පාදක කරගනිමින් පාසලකට ලබා දෙන ශිෂ්‍යත්ව සංඛ්‍යාව තීරණය කර ඇත. ඒ අනුව පාසලකට ලැබෙන අවම ශිෂ්‍යත්ව සංඛ්‍යාව 04ක් වන අතර උපරිම ශිෂ්‍යත්ව සංඛ්‍යාව 22කි. 2024 අප්‍රේල් මාසයේ සිට මාස 12ක කාලයක් දක්වා එක් දරුවෙකු සඳහා මාසිකව රුපියල් 3000/- බැගින් සිසුන් ලක්ෂයක් සඳහා මේ යටතේ ශිෂ්‍යත්ව ප්‍රදානය කරනු ලබයි.

ශිෂ්‍යත්ව ප්‍රදානය සංකේතවත් කරමින් කොළඹ දිස්ත්‍රික්කයේ සිසුන් 5108 දෙනෙකු සඳහා ශිෂ්‍යත්ව හා තිළිණ ලබාදීම අද සිදු කෙරිණි.
ජනාධිපති රනිල් වික්‍රමසිංහ මහතා සංකේතාත්මකව ශිෂ්‍යත්ව ප්‍රදානයට එක් විය.

අනතුරුව ශිෂ්‍යත්වලාභී සිසු දරුවන් අතරට ගිය ජනාධිපතිවරයා ඔවුන්ගේ තොරතුරු ද විමසීය.

මෙම උත්සව සභාව ඇමතූ ජනාධිපති රනිල් වික්‍රමසිංහ මහතා වැඩිදුරටත් මෙසේද පැවසීය.

අද මේ රටේ දරුවන්ට ඉතා සතුටුදායක දිනයක්. මෙම ශිෂ්‍යත්ව මුදල් හිමිවිම පිළිබඳ පළමුව ඔබ සියලුදෙනාට සුබ පතනවා. මෙම වැඩසටහන යටතේ ශිෂ්‍යත්ව ලක්ෂයක් ප්‍රදානය කිරීමට කටයුතු කර තිබෙනවා. ඒ වගේම උසස් පෙළ සිසුන් වෙනුවෙන් රුපියල් 6,000/ක ශිෂ්‍යත්වයක් ද පිරිනැමෙනවා. මෙම ශිෂ්‍යත්ව ප්‍රදානය කිරීම වෙනුවෙන් අප ජනාධිපති අරමුදලින් රුපියල් බිලියන 04ක් වෙන් කර තිබෙනවා.

පසුගිය වසර 03 අප සියලුදෙනාටම අසීරු කාලයක් වුණා. අපි සියලුදෙනා දුක් වින්දා. ආහාර නැතිව ගියා. දරුවන්ට පාසලට යාමට ප්‍රවාහන පහසුකම් සපයාගත නොහැකි වුණා. දැන් එම කාලය අවසන් වී තිබෙනවා. ජනාධිපතිවරයා ලෙස මම මේ රටේ දරුවන්ට දුක් විදීමට ඉඩ නොතබන බව තීරණය කළා. ඒ අනුව හැකි ඉක්මණින් මේ රට ආර්ථික වශයෙන් ගොඩගැනීමට අවශ්‍ය වැඩපිළිවෙළ ක්‍රියාත්මක කළා.

රට බංකොළොත්භාවයෙන් නිදහස් කරගැනීමට අවශ්‍ය වැඩපිළිවෙළ අප මේ වන විට ක්‍රියාත්මක කර තිබෙනවා. ඒ තුළින් ඉදිරි වසර 05-10 තුළ දරුවන්ට වඩා හොඳ රටක් නිර්මාණය කර දීම අපේ අරමුණයි.

පසුගිය ආර්ථික අර්බුදය හමුවේ බොහෝ දෙනෙකුට ආදායම් මාර්ග අහිමි වුණා. ඒ අනුව අස්වැසුම වැඩසටහන හරහා පවුල් ලක්ෂ 24කට සහන ලබා දීමට අප කටයුතු කර තිබෙනවා. ඒ වගේම ජනතාවට තමන් ජිවත්වන ඉඩමේ නීත්‍යානුකූල අයිතිය ලබාදීම වෙනුවෙන් උරුමය වැඩසටහන ක්‍රියාත්මක කළා. ඒ වගේම නාගරික මහල් නිවාසවල ජිවත්වූ ජනතාවට එම නිවසේ අයිතිය හිමිව තිබුණේ නැහැ. ඒ නිසා රජයේ ඉඩමක ජීවත් වූ, රජයේ ඉඩමක ගොවිතැන් කළ, රජයේ මහල් නිවාසයක ජිවත් වු සියලුදෙනාට එම අයිතිය ලබා දි තිබෙනවා. ඒ වගේම රටේ දරුවන්ගේ අධ්‍යාපනය කෙරෙහි අවධානය යොමු කරමින් ඔබ සියලුදෙනාට මෙම ශිෂ්‍යත්ව ප්‍රදානය කර තිබෙනවා.

ඒ අනුව ජනතාවට ආදායම් ලබාදීමට, අයිතිය ලබාදීමට මෙන්ම දරුවන්ට අධ්‍යාපනය ලබාදීමට අප කටයුතු කර තිබෙනවා. එසේනම් මෙම ශිෂ්‍යත්වයෙන් නිසි ප්‍රයෝජන ලබාගෙන, තමන්ගේ අධ්‍යාපනය දියුණු කර ගන්නා මෙන් මා මේ දරුවන්ගෙන් ඉල්ලා සිටිනවා.

අග්‍රාමාත්‍ය දිනේෂ් ගුණවර්ධන, ප්‍රවාහනය මහාමාර්ග හා ජනමාධ්‍ය අමාත්‍ය බන්දුල ගුණවර්ධන රාජ්‍ය අමාත්‍ය සුරේන් රාඝවන්, පාර්ලිමේන්තු මන්ත්‍රීවරුන් වන වජිර අබේවර්ධන, මේජර් ප්‍රදීප් උදුගොඩ, බස්නාහිර පළාත් ආණ්ඩුකාර මාර්ෂල් ඔෆ් එයාර් ෆෝස් රොෂාන් ගුණතිලක, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක, ජනාධිපති ලේකම් සමන් ඒකනායක, අග්‍රාමාත්‍ය ලේකම් අනුර දිසානායක, මුදල් අමාත්‍යාංශයේ ලේකම් මහින්ද සිරිවර්ධන, රාජ්‍ය පරිපාලන අමාත්‍යාංශයේ ලේකම් ප්‍රදීප් යසරත්න, ජනාධිපති අරමුදලේ ලේකම්, ජනාධිපති ජ්‍යෙෂ්ඨ අතිරේක ලේකම් ඩබ්ලිව්.ඒ.සරත් කුමාර යන මහත්ම මහත්මීන් ඇතුළු පිරිසක් මෙම අවස්ථාවට එක්ව සිටියහ.