මා රටේ නායකත්වය කරා පැමිණියේ එක්සත් ජාතික පක්ෂයේ පරපුරක උරුමය ද සමඟයි
- එක්සත් ජාතික පක්ෂය ආරක්ෂා කර ගැනීමට ඡන්දය දුන් දෙලක්ෂ පනස්දහසට ස්තූතිවන්ත වෙනවා.
- පක්ෂය දෙකඩ කරමින් ගොඩනැගු සමගි ජන බලවේග තුළ අද ඇත්තේ වෛරය පමණයි.
- එක්සත් ජාතික පක්ෂයේ එදා මෙන්ම අදත් දැක්ම වන්නේ රට ගොඩනැඟීමයි – මහනුවර දිස්ත්‍රික් එක්සත් ජාතික පක්ෂ ක්‍රියාකාරීන් සමඟ පැවති හමුවේ දී ජනපති පවසයි.
ජේ.ආර්. ජයවර්ධන ජනාධිපතිවරයා සමඟ කටයුතු කරමින්, රණසිංහ ප්‍රේමදාස ජනාධිපතිවරයා යටතේ පක්ෂය ආරක්ෂා කරමින්, ඩී.බී. විජේතුංග ජනාධිපතිවරයා සමඟ ද කටයුතු කර එක්සත් ජාතික පක්ෂයෙන්ම අග්‍රාමාත්‍ය ධූරයට පත්ව, රටේ නායකත්වය කරා තමා පැමිණියේ එක්සත් ජාතික පක්ෂයේ පරපුරක උරුමය සමඟ බව ජනාධිපති රනිල් වික්‍රමසිංහ පැවසීය.
සජිත් ප්‍රේමදාස එක්සත් ජාතික පක්ෂය දෙකඩ කර සමගි ජන බලවේගය ගොඩනැඟූ බවත්, ඒ පිළිබඳ තමන් කණගාටු වන්නේ එතුමාගේ පියාගේ පාලන සමයේ දී පක්ෂය කැඩීයාමට ගිය අවස්ථාවේ පක්ෂය ආරක්ෂා කර දුන්නේ තමන් වීම නිසා බවත් ජනාධිපතිවරයා කියා සිටියේය.
ජනාධිපති රනිල් වික්‍රමසිංහ මේ බව සඳහන් කර සිටියේ මහනුවර ජනාධිපති මන්දිරයේදී (07) පැවති එක්සත් ජාතික පක්ෂ ක්‍රියාකාරී හමුව අමතමිනි.
එක්සත් ජාතික පක්ෂය කැඩී යාමට ඉඩ නොතැබුවා නම් අද එක්සත් ජාතික පක්ෂය ශක්තිමත්ව ඉදිරියට පැමිණෙන බව මෙහිදී පෙන්වා දුන් ජනාධිපතිවරයා, පක්ෂය දෙකඩ කරමින් ගොඩනැඟු සමගි ජනබලවේගය තුළ අද එක්සත් ජාතික පක්ෂයේ ප්‍රතිපත්ති නොමැති බවත්, එම පක්ෂය තුළ එක්සත් ජාතික පක්ෂයේ අයෙකු නම් කිරීම කිසාගෝතමිය අබ ඇටයක් සොයා ගිය ගමනටත් වඩා අසීරු වී ඇති බවත් පෙන්වා දුන්නේය.
එක්සත් ජාතික පක්ෂයේ නායකයාට ජනාධිපති ධූරය ලබා දීම නිසා පොහොට්ටුවෙන් ඉවත් වු පිරිස සමඟ එක්ව අගමැති ධූරය භාර ගැනීමට සූදානම් වු සමගි ජන බලවේගය තුළ අද ඇත්තේ ප්‍රතිපත්තියක් නොව, වෛරයක් බවද පෙන්වා දුන් ජනාධිපතිවරයා එක්සත් ජාතික පක්ෂය කිසිදා වෛරී දේශපාලනයක නිරත නොවන බවත් අද දවසේ සැබෑ අවශ්‍යතාවය වී තිබෙන්නේ රටේ ආර්ථිකය දියුණු කිරීම බවත් ප්‍රකාශ කළේය.
මෙහිදී වැඩිදුරටත් අදහස් දැක්වු ජනාධිපති රනිල් වික්‍රමසිංහ මෙසේ ද පැවසීය,
අද අප මෙහි රැස් වී සිටිනේ වෙනස් දේශපාලන වාතාවරණයක් තුළයි. 2022 අර්බුදය සමඟ රටේ ආර්ථිකය මෙන්ම දේශපාලන පක්ෂ ක්‍රමයද කැඩී ගියා. අද අපේ මූලික වගකීම වන්නේ කුමන දේශපාලන පක්ෂයකට අයත් වුවත් රටේ ආර්ථිකය බේරාගෙන ජනතාව ජිවත් කරවීමයි.
එක්සත් ජාතික පක්ෂය මෙම ආර්ථික අර්බුදය මුල සිටම හඳුනාගෙන සිටියා. අපි 2020 මැතිවරණයේ දී ප්‍රකාශ කළා මේ ආර්ථික අර්බුදයට මුහුණ දෙන්න නම් ඩොලර් බිලියන 03ක් අවශ්‍යයි කියලා. එසේ ප්‍රකාශ කළේ එක්සත් ජාතික පක්ෂය පමණයි.
නමුත් පිරිසක් එක්සත් ජාතික පක්ෂය කඩලා සජිත් ප්‍රේමදාස මහතා සමඟ සමගි ජන බලවේගය ඇති කරගත්තා. මා කණගාටු වන්නේ එතුමාගේ පියා යටතේ පක්ෂය කැඩී යාමට ගිය අවස්ථාවේ එදා පක්ෂය ආරක්ෂා කරදුන්නේ මම වීම නිසයි. කෙසේ හෝ මෙම පක්ෂය කඩන්නේ නැතිව අප ඉදිරියට ගියා නම් දේශපාලන වශයෙන් අද අප ශක්තිමත් පක්ෂයක්. අපට ආණ්ඩුවක් හදන්න අවස්ථාව තිබුණා.
මහින්ද රාජපක්ෂ අගමැතිවරයා ඉවත් වන විට ඔවුන් ප්‍රකාශ කළේ අපට මෙය කරන්න බැහැ කරන්න පුළුවන් අයෙකුට සහාය ලබා දෙනවා කියලයි. එම කාලයේදී ඔවුන්ගේ සහාය අවශ්‍යව තිබුණා.
ඇයි එදා අපට එක්වෙලා ආණ්ඩු බලය ලබාගන්න නොහැකි වුණේ. එක්සත් ජාතික පක්ෂයේ කොටසක් අද විපක්ෂයේ සිටින්නේ පක්ෂය කැඩුව නිසයි. ඒ වගේම මම අගමැති ධූරයට පත්වූ අවස්ථාවේ මට සහාය දෙන්න කියලා මම නැවත ඉල්ලා සිටියා. නමුත් එම සහයෝගය හිමි වුණේ නැහැ.
ඉන්පසුව මේ රටේ විශාල අර්බුදයක් ඇති වුණා. මම අගමැතිවරයා ලෙස ජනාධිපති ධූරය භාර ගැනීමට නියමිතව තිබුණා. එවිට කිව්වා සමගි ජන බලවේගයට ජනාධිපති ධූරය අවශ්‍ය නිසා විපක්ෂ නායකව ජනාධිපති කරන්න කියලා. ඉන්පසුව එක්සත් ජාතික පක්ෂයේ නායකයාට රටේ ජනාධිපතිකම දෙනවා කියලා පොහොට්ටුවෙන් ඉවත් වු පිරිස සමඟ එකතු වෙලා අගමැති වෙන්න සුදානම් වුණා.
රටේ අසීරු අවස්ථාවේදී පොහොට්ටුවේ බහුතරයක් ප්‍රකාශ කළා අගමැතිවරයාට අවස්ථාව දෙමු, අප සහාය ලබා දෙන්නම් කියලා.
සුළුතරයක් ඊට විරුද්ධ වුණා. පොහොට්ටුවේ සභාපති ජී.එල්. පීරිස් කිව්වා පොහොට්ටුවේ සහය දෙන්න ඕන පොහොට්ටුවේ සාමාජිකයෙක්ට කියලා. ඉන්පසුව ඔහු ඇතුළු සුළුතරයක් විපක්ෂයට ගියා. පොහොට්ටුවේ අපේක්ෂකයෙක් ජනාධිපති ඡන්දයට ඉදිරිපත් කරන්න ඕන කිව්වා. එවිට හිටපු අමාත්‍ය ඩලස් අලහප්පෙරුමව ඉදිරිපත් කළා. එවිට සජිත් ප්‍රේමදාස පොහොට්ටුවේ අගමැති වෙන්න සූදානම් වුණා. මුලින් අගමැති ධූරය භාර ගන්න බැහැ කියලා පැනලා ගියා.
කෙසේ හෝ මම ජනාධිපති ධූරයට පත් වුණා. මම එම වගකීම භාරගත්තේ දේශපාලනය ගැන හිතලා නොවෙයි, රට ගැන හිතලා. ඒ සඳහා සෑම පක්ෂයකම සහාය ඉල්ලුවා. කෙසේ හෝ අප සියලුදෙනා එකට එකතුව මේ ප්‍රශ්නය විසඳා තිබෙනවා. පොහොට්ටුව සහ එක්සත් ජාතික පක්ෂය එදා ගම්වල එකිනෙකාට විරුද්ධව කටයුතු කළ කණ්ඩායම්. නමුත් අපි රට වෙනුවෙන් එකතු වුණා. දැන් රටේ ආර්ථිකය සාමාන්‍ය තත්ත්වයට පත්වෙමින් තිබෙනවා.
එදා සමගි ජන බලවේගය කිව්වේ එක්සත් ජාතික පක්ෂය තිබෙන්නේ අපේ ළඟයි, අපට සිරිකොත පමණයි නැත්තේ, අපට බලය ලබා දෙන්න අපි සිරිකොත අල්ල ගන්නවා කියලා. දැන් සන්ධානයක් හදලා ජී.එල් පීරිස් ඇතුළු පොහොට්ටුවේ කණ්ඩායම සමගි ජන බලවේගය අල්ලගෙන තිබෙනවා.
සජිත් සමඟ එකට අසුන් ගන්නේ රංජිත් මද්දුමබණ්ඩාර පමණයි. එක්සත් ජාතික පක්ෂයේ වෙන කිසිවෙක් එහි නැහැ. සමගි ජන බලවේගය තුළ එක්සත් ජාතික පක්ෂයේ අයෙකු නම් කිරීම කිසාගෝතමියට අබ ඇටයක් සොයා ගැනීමටත් වඩා අසීරු කාර්යයක් වී තිබෙනවා.
අද සමගි ජන බලවේගය තුළ එක්සත් ජාතික පක්ෂයේ ප්‍රතිපත්ති නැහැ. එසේ නම් අද ඔවුන්ට එක්සත් ජාතික පාක්ෂිකයන් කියන්න බැහැ. පසුගිය මැතිවරණයේදී කිව්වේ නියම එක්සත් ජාතික පක්ෂය තිබෙන්නේ ඔවුන් ළඟ කියලා. එවිට එක්සත් ජාතික පක්ෂයේ පිරිසක් ඔවුන්ට ඡන්දය දුන්නා. දැන් ජී.එල්. පීරිස් ඇතුළු පොහොට්ටුවේ කණ්ඩායමට සමගි ජන බලවේගයට යට වුණහම ඊට එක්සත් ජාතික පක්ෂය කියන්නේ කොහොමද කියලා මම අහන්න කැමතියි. ඒ නිසා සමගි ජන බලවේගය ගමේ එක්සත් ජාතික පාක්ෂිකයන් නොමඟ යවා තිබෙනවා. ඔවුන් නැවත එක්සත් ජාතික පක්ෂය වටා පෙළගැසිය යුතුයි.
ජේ.ආර්. ජයවර්ධන සමග කටයුතු කර, ප්‍රේමදාස ජනාධිපතිවරයාව ආරක්ෂා කරමින් ඔහු සමග කටයුතු කර, ඩී.බී. විජේතුංග මහතාව ජනාධිපති කර එම පක්ෂයෙන්ම අගමැති වී ඉන්පසුව මම රටේ නායකත්වයට පත් වුණා. මා ඉදිරියට පැමිණියේ එවන් පරපුරක උරුමය සමඟයි. එක්සත් ජාතික පක්ෂය නැති කිරීමට ඇතැමුන් උත්සාහ කළා. ඒ නිසා එක්සත් ජාතික පක්ෂය ආරක්ෂා කර ගැනීමට ඡන්දය ලබා දුන් දෙලක්ෂ පනස්දහසට මම ස්තූතිවන්ත වෙනවා. දැන් අප එක්සත් ජාතික පක්ෂය ලෙස එක්ව කටයුතු කළයුතුයි. ඒ සඳහා ගමේ පාක්ෂිකයන් එක්කරගත යුතුයි.
අසීරු කාලයේ රට බේරගන්න පක්ෂ බේදයකින් තොරව අපි සියලුදෙනා එකට එකතු වුණා. ඇතැම් අය චෝදනා කරනවා මහින්ද රාජපක්ෂ සමඟ එක් වුණා කියලා. පොදුජන පෙරමුණේ බහුතරයක් මට සහාය ලබා දෙන්න එකඟ වුණා. එවිට එම බහුතරය සමඟ එක්වීමට මහින්ද රාජපක්ෂ සිදු වුණා. සභාපතිවරයා බහුතරයට විරුද්ධව කටයුතු කළා. මෙහි තිබෙන්නේ වෛරයයි. ප්‍රතිපත්ති නොවෙයි. නමුත් අප තුළ වෛරය නැහැ. අපට අවශ්‍ය රට දියුණු කිරීමටයි.
රට තුළ තිබෙන්නේ එදා තිබුණ ආර්ථික තත්ත්වය නොවෙයි. අද සියලු ජනතාවට ජීවත්වීමේ අයිතිය ලැබී තිබෙනවා. අප ආර්ථික වශයෙන් දිනෙන් දින ඉදිරියට යනවා. ඒ සඳහා අපි එකතුවෙලා කටයුතු කරමු.
අපි ආරම්භ කර තිබෙන අස්වැසුම සහ උරුමය වැඩසටහන් තුළ තිබෙන්නේ එක්සත් ජාතික පක්ෂයේ ප්‍රතිපත්ති බව කිවයුතුයි. ඒ නිසා මෙම වැඩපිළිවෙළට විරුද්ධවීමට සමගි ජන බලවේගයට හැකියාවක් නැහැ. ඔවුන් ඊට සහාය ලබා නොදෙන්නේ එක්සත් ජාතික පක්ෂයේ ප්‍රතිපත්ති දැන් ඔවුන් ළඟ නොමැති නිසයි.
එක්සත් ජාතික පක්ෂයේ ප්‍රතිපත්ති තිබෙන්නේ ඩී.එස්. සේනානායක මැතිතුමාගේ පක්ෂය පිළිගන්න, ජේ.ආර්. ජයවර්ධන මැතිතුමාගේ වැඩපිළිවෙළ පිළිගන්න එමෙන්ම 1989 ප්‍රේමදාස ජනාධිපතිවරයාගේ ආණ්ඩුව ආරක්ෂා කළ අය සිටින තැනයි යන පණිවිඩය ගමේ පාක්ෂිකයාට ලබාදෙන්න කියන ඉල්ලීම මම ඔබෙන් කරනවා.
අමාත්‍ය මනූෂ නානායක්කාර, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්‍ය මණ්ඩල ප්‍රධානි සාගල රත්නායක, එක්සත් ජාතික පක්ෂයේ මහ ලේකම් පාලිත රංගේ බණ්ඩාර , හිටපු පාර්ලිමේන්තු මන්ත්‍රී කේ.කේ. පියදාස, එක්සත් ලක්වනිතා පෙරමුණේ සභාපතිනි ශාන්තිනී කෝන්ගහගේ, මහනුවර මහනගර සභාවේ හිටපු නගරාධිපති කේෂර සේනානායක, එක්සත් ජාතික පක්ෂ මහනුවර දිස්ත්‍රික් නායක චානක අයිලප්පෙරුම ඇතුළු එක්සත් ජාතික පක්ෂ සාමාජිකයන් විශාල පිරිසක් මෙම අවස්ථාවට එක්ව සිටියහ.
